Bachpan

Woh bachpan kitna acha tha, jab rait se khela karti thi,

Aur bhaagh mein khilay phoolon ko, subh shaam takaa karti thi.

Apni dunya ki mai, malika hua karti thi-

Aik hath mein guriya hoti thi, aur cycle pe raaj mai karti thi.

Na thi mujh ko parwah, kisi ki wafa ki,

Na tha hosh mujh ko, kaisay chalay gi zindagi ki yeh gaari.

Lagti thi chot gar kabhi, tou ansu’on se mai roti thi,

Magar sabar tha itna k wapas uth khari hoti thi.

Ammi Abbu ke beech har raat mai soya karti thi,

Chonka de gar kabhi koi khuwaab, tou lori ammi sunaya karti thi.

Na tha khof kabhi k yun bhatak jaun gee mai rastay mein,

Na tha jana kabhi k yun gir jaun gee mai iss garh mein.

Ab na hai koi lori jo chamkaye mera andhera,

Na hai koi guriya jo banay tanhai ka sahara.

Na hun mai malika ab kisi shehr ki,

Na hai meri nazar mein meri zindagi ka rasta.

Mai nikal pari hun iss safar pe ban k aik aurat,

Karna hai jis ko ab apni har mushkil ka saamna.

Lagay gar chot kabhi tou rona nahi hai,

Pairon mein gar hon aablay tou bhi darna nahi hai.

Na rakhni hai koi umeed k day ga koi sahara,

Na karna hai bharosa k milay ga koi kinara.

Gayi jo kabhi uss paar, tou poochun gi apne rabb se,

Kyun cheen’ta hai woh hum se hamaray bachpan ki dunya,

Woh rang, woh bahaar, aur woh roshan nazaara!

- My first attempt at Urdu Poetry :)

Advertisement